Gihatagan og dakong pagtagad sa lokal nga pangagamhanan sa dakbayan sa Malaybalay ang pagpalig-on sa mga programa alang sa panglawas ug medical assistance, ilabina alang sa mga kabus ug mga residente nga nanginahanglan og pinansyal nga tabang panahon sa pagkasakit ug pagpaospital.
Gitin-aw ni Malaybalay City Mayor Atty. Jay Warren Pabillaran nga padayon ang pagpaningkamot sa lokal nga pangagamhanan aron mapalapad ang serbisyo panglawas ug matubag ang mga panginahanglan sa mga residente.
Apan giangkon sa mayor nga dili pa igo ang kasamtangang pondo sa siyudad aron matubag dayon ang tanang requests sa mga residente.
Sumala kaniya, mokabat na sa P52 milyon ang total nga bayronon, apan P21 milyon pa lamang ang nabudget, nga nagbilin og P31 milyon nga kakulang o arrears.
Samtang, padayon usab ang panawagan sa mayor sa mga residente nga pahimuslan ang mga programa sa PhilHealth YAKAP ug PhilHealth GAMOT, ingon man ang AICS kon Assistance to Individuals in Crisis Situations, alang sa kwalipikadong mga nanginahanglan og tabang sa hospital bills, tambal, burial assistance ug uban pang emerhensiyang panginahanglan.