Gibana-banang mokabat sa ₱225,000 ang kinatibuk-ang danyos human maugdaw ang usa ka balay sa Purok 6, Barangay Sinayawan, Valencia City, kagahapong adlawa.
Sumala sa report gikan sa Valencia City Fire Station, nadawat nila ang alarma pasado alas-10:30 sa buntag. Miabot ang mga bombero sa dapit alas-10:44 diin daling nakontrolar ang kalayo ug hingpit nga nadeklarar nga fire out alas-11:10 sa buntag.
Sa pakighinabi sa Bombo Radyo Malaybalay kay FO1 Niko C. Puno, Fire and Arson Investigator sa Valencia City Fire Station, na matod pa ang inisyal nga imbestigasyon nagpakita nga posible nagsugod ang kalayo sa bahin sa divider nga duol sa telebisyon o speaker. Subay sa asoy sa asawa sa tag-iya sa balay, nakadungog pa kini og kalit nga pagbuto sa wala pa mibuswak ang dakong kalayo.
Padayon pang gisusi sa Bureau of Fire Protection (BFP) ang tinuod nga hinungdan sa insidente, apan gituohang duna kini kalabutan sa electrical connection—nga maoy kasagarang rason sa mga sunog nga natala sa dakbayan niining milabayng mga bulan.
Gibutyag ni Puno nga niining bulan sa Marso lamang, miabot na sa pito ka sunog ang ilang narespondehan sa Valencia City. Sa kinatibuk-an, duna na’y 13 ka insidente sukad niadtong Enero hangtod Marso, diin kasagaran sa mga hinungdan mao ang electrical issues ug pagsunog sa basura nga mikatap.
Tungod niini, nagpahinumdom ang BFP sa publiko nga kanunay’ng ibton ang mga kagamitang de-kuryente o appliances kon wala gamita ug daling manawag sa mga otoridad sa higayon nga makabantay og sunog aron malikayan ang mas dakong kadaot.