Mipailalom sa usa ka send-off ug thanksgiving mass ang sikat nga P-pop girl group nga BINI isip kabahin sa ilang pagpangandam alang sa gipaabot nga performance sa Coachella Valley Music and Arts Festival.
Gihimo ang maong misa niadtong Lunes, Marso 23, sa Chapel of the Annunciation of Our Lord, diin kompleto ang walo ka miyembro nga sila si Jhoanna, Aiah, Colet, Maloi, Gwen, Stacey, Mikha, ug Sheena.
Sumala sa grupo, usa na ka naandan nila ang pag-ampo ug pagpahigayon og misa sa matag dako nga event aron magpasalamat ug mangayo og giya. Aminado ang miyembro nga si Mikha nga dili pa gihapon sila makatuo sa maong dako nga oportunidad, apan gipasalig nila nga ihatag ang ilang 100 percent performance sa entablado sa Coachella.
Kahinumduman nga duna usab silay gihimo nga send-off event sa Market! Market! sa Taguig nga gitambongan sa kapin 15,000 ka mga fans o nailhang mga “Blooms.” Sa maong event, gipahibalo usab sa grupo ang pagpagawas sa ilang bag-ong EP nga giulohan og “Signals” karong Abril 9.
Nakatakdang mo-perform ang BINI sa Coachella karong Abril 10 ug 17, diin sila ang mahimong labing unang homegrown Filipino group nga makatungtong sa maong prestihiyosong international music festival.