Pormal nga nagpasaka og ethics complaint ang National Bureau of Investigation (NBI) batok kang Cavite Representative Kiko Barzaga ngadto sa House Ethics Committee.
Ang maong lakang gihimo sa NBI aron ipa-imbestigar ang mambabalaod tungod sa mga social media post niini nga adunay kalabutan sa nahitabong pinusilay sa sulod sa Senado.
Sumala kang NBI Director Melvin Matibag, gi-validate sa Meta ang mga post ni Barzaga nga nagpasangil sa NBI nga adunay kalambigitan sa giingong pag-attempt og patay sulod sa Senado.
Gawas niini, gipamugos usab ni Matibag nga nakita sa maong mga post nga nag-live stream si Barzaga samtang nahitabo ang maong insidente.
Tungod niini, naglaum ang NBI nga mosangpot ang ilang reklamo ngadto sa pormal nga disciplinary action batok sa kongresista.
Nunot niini, giakusaran ni Cavite Representative Kiko Barzaga si Pangulong Bongbong Marcos nga maoy nagmando sa National Bureau of Investigation (NBI) sa pagpasaka og ethics complaint batok kaniya.
Ang maong reklamo gipahigayon tungod sa iyang mga post human sa nahitabong pagpabuto sa Senado niadtong Mayo 13.
Matud pa ni Barzaga, posibleng naapektuhan ang presidente sa pag-ubos sa iyang trust ratings.