Gipasabot ni National Bureau of Investigation (NBI) Director Melvin Matibag nga dili mahimong isilbi ang arrest warrant batok kang Senador Ronald “Bato” dela Rosa ngadto sa iyang mga abogado, samtang padayon siyang gipangita sa mga awtoridad may kalabotan sa warrant gikan sa International Criminal Court (ICC).
Gipunting sa NBI Director nga kinahanglan personal nga isilbi ang maong warrant ngadto sa mismong indibidwal, base sa nakasulat sa Rules of Court.
Matud ni Matibag, wala niya masayri kung asa gikan ang ideya nga pwede ihatag ang warrant sa abogado aron kini mapasa sa senador, ug posible nga adunay kalibog sa mga nauna nga proseso sama sa subpoena, summons, ug arrest warrant.
Gipadayag kini sa NBI Chief human mikatap ang video sa abogado ni Dela Rosa nga si Atty. Jimmy Bondoc nga nagsulti nga mahimo matud pa isilbi ang ICC warrant pinaagi sa legal counsel.
Sa pikas bahin, gipasalig saPhilippine National Police nga transparent ug subay sa balaod ang ilang pagpatuman sa warrant of arrest batok kang Senador Ronald “Bato” dela Rosa.
Sumala ni PNP Chief Gen. Jose Melencio Nartatez Jr., regular nga trabaho sa kapulisan ug ubang law enforcement agencies ang pag-implementar sa warrant human kini giila nga balido sa Department of Justice.
Tungod niini, gihatagan na og direktiba ang tanang PNP units aron mangita sa senador pinaagi sa ilang tracking ug manhunt operations.