Gikondenar ni NATO Secretary General Mark Rutte ang walay hunong nga pag-atake sa Russia ngadto sa Ukraine, dungan sa iyang pagpasalig nga dili mobiya ang ilang alyansa sa pagtabang sa maong nasod. Atol sa iyang pagbisita sa Kyiv, nakigtagbo si Rutte kang Presidente Volodymyr Zelensky diin iyang gipahabalo nga magpabiling lig-on ang suporta sa NATO bisan pa man sa mga missile ug drone strikes nga gilusad sa Russia nga nigo sa mga power plants ug imprastraktura sa Ukraine.
Sumala ni Rutte, ang maong mga pag-atake usa ka pagsulay sa Russia nga bungkagon ang kaisog sa mga taga-Ukraine, apan mas gipahugtan hinuon niini ang determinasyon sa NATO nga mohatag og dugang hinabang. Sa pikas bahin, nagpasalamat si Zelensky sa maong pasalig samtang padayon ang iyang panawagan alang sa dugang mga armas ug air defense systems aron mapanalipdan ang ilang katawhan batok sa nagkagrabe nga gubat.