Nahimong tighugas og plato o dishwasher ang usa ka milyonarya sa usa ka restaurant sa Chengdu City, Sichuan Province, China.
Ang iyang rason, nasumhan siya sa iyang komportable nga kinabuhi ug gusto niya nga adunay iyang himuon ug atimanon matag adlaw.
Nag-viral sa Chinese social media ang video sa maong babaye diin nanaog siya gikan sa iyang Bentley, nagsul-ob og apron ug rubber boots, ug misulod sa restaurant aron magtrabaho isip manghugasay og plato o dishwasher.
Sumala sa Chinese media ug sa mga nakaila kaniya, adunahan kaayo ang maong babaye, apan gusto lang niini nga adunay trabaho ug mahimo sa iyang adlaw-adlaw nga kinabuhi.
Mismo ang iyang anak ang gahatud ug gasundo kaniya sa trabaho.
Daghang netizen ang midayeg kaniya tungod sa iyang pagkamapaubsanon ug pagkugihan sa pagtrabaho bisan milyonarya na kini.