Giguba sa militar sa Israel ang usa ka dakong underground tunnel nga gigamit sa militanteng grupong Hezbollah sa usa ka baryo sa habagatang bahin sa Lebanon. Sumala sa hiniusang pamahayag ni Israeli Prime Minister Benjamin Netanyahu ug Defense Minister Israel Katz, ang maong operasyon nag-target sa usa ka pasilidad nga duna’y gitas-on nga kapin sa 200 ka metro ug giladmon nga kapin sa 25 ka metro didto sa lungsod sa Majdal Zoun.
Nasayran sa mga otoridad nga nasulod sa maong underground complex ang ginatos ka mga armas ug pipila ka launch shafts o dapit nga ginalansaran og mga missile nga gitumong unta ngadto sa teritoryo sa Israel. Giingong gipahibalo usab sa Israel ang Estados Unidos sa dili pa gipahigayon ang pagguba sa maong estruktura.
Kini nga pag-atake nahitabo duha ka adlaw lamang human nagkasabot ang Lebanon ug Israel sa usa ka security arrangement nga gipatigbabawan sa US aron unta mapakubos ang tensyon sa utlanan. Tungod niini, dinalian nga gikondenar sa Hezbollah ang maong operasyon ug gitawag kini nga usa ka dayag nga paglapas sa kasabutan sa ceasefire, samtang gipahayag sa Israel nga magpabilin ang ilang mga sundalo sa security zone aron padayong papason ang bisan unsang hulga batok sa ilang mga lungsoranon.