Nangayo og publikong pasaylo ang “Drag Race Philippines” Season 3 winner nga si Maxie Andreison human nikatap pag-usab sa social media ang karaan nga video diin makita nga nanampal ug nanipa siya og usa ka transwoman nga fan.
Pinaagi sa usa ka Instagram Live, gipatin-aw ni Maxie (Jayvhot Galang sa tinuod nga kinabuhi) nga ang maong insidente nahitabo pa niadtong 2023 human aksidenteng naibut sa usa ka hubog nga fan ang iyang wig human sa iyang performance. Giklaro niya nga dugay na silang nagka-estorya ug nagka-areglo sa maong indibidwal sa wala pa nikatap pag-usab ang video karon.
Bisan pa man niini, giangkon sa maong performer nga dako ang iyang pagmahay tungod kay sayop gyud ang manakit og isigka-tawo ubos sa bisan unsang rason. Nisaad usab siya sa iyang mga tigsporta nga padayon siyang magkat-on aron mamahimong mas maayong ehemplo ug tawo sa unahan.