Gidid-an o kasamtangang gipahunong ang mga vendor sa duha ka barangay sa Valencia City sa pagbaligya sulod sa mga tunghaan.
Gipalig-on sa lokal nga panggamhanan sa dakbayan ang pagpahibalo bahin sa panglawas ug kalimpyo human sa mga gidudahang kaso sa Hepatitis A nga naglambigit sa mga estudyante sa Barangay Lurugan ug San Carlos.
Kadaghanan sa mga naapektuhan mga bata ug estudyante sa Barangay Lurugan National High School, lakip ang mga taga-San Carlos nga nagtungha.
Subay niini, nasuta nga usa sa nag-unang suliran mao ang kawad-on sa tubig panghugas nga usa sa gitudlong hinungdan sa pagkaylap sa maong sakit.
Gilauman usab sa lokal nga panggamhanan nga matabangan ang mga apektadong pamilya pinaagi sa pagkaon ug pagbayad sa mga pagsusi aron makumpirma ang mga kaso. Lakip na niini ang pagbuhat og mga lakang aron maresolba ang problema sa panubig sa mga dapit nga labing apektado.
Gidugang uusab sa opisyal ang pagpanalipod sa panglawas pinaagi sa kanunay nga paghugas sa kamot ug pagmintinar sa personal nga kalimpyo aron malikayan ang pagkaylap sa Hepatitis A.
Kahinumduman nga mikabat sa 16 ka indibidwal ang naigo sa pagkuyanap sa sakit samtang mukabat sa kapin 70 ang padayon pang gipailawom sa hugot nga pagsusi.
Samtang gilauman ang pag-apod apod og mga food packs sa mga vendors o negosyante nga apektado sa temporyong paghunong sa operasyon sa pagpamaligya.