Pormal nang nagpagawas og subpoena sa unang adlaw pa lamang sa pagdungog ang House Committee on Justice aron sapagpugos nga ipasumite ang mga Statement of Assets, Liabilities, and Net Worth (SALN) ni Vice President Sara Duterte, lakip na ang rekord sa imbestigasyon nga may kalabotan sa giingong paghulga sa kinabuhi sa First Family.
Sa boto 34 ka pabor, usa ka supak, ug walay abstention, gipalig-on sa komite ang mosyon ni House Committee on Good Government and Public Accountability Chairperson ug Manila Third District Rep. Joel Chua.
Tumong sa mosyon nga mag-isyu og subpoena duces tecum ngadto sa Office of the Ombudsman, nga mao ang opisyal nga nagbantay sa maong mga dokumento. Â
Sakop sa subpoena ang mga SALN ni Duterte sa panahon nga siya ang mayor sa Davao City gikan tuig 2007 hangtod 2013 ug 2016 hangtod 2022, ingon man ang iyang kasamtangang SALN isip bise presidente gikan 2022 hangtod 2025.
Gihimo kini nga lakang dungan sa pagdungog sa komite aron masuta kung adunay probable cause ang giatubang nga impeachment complaint sa Ikaduhang Pangulo.
Gawas sa bahandi sa bise presidente, giaprobahan usab sa komite pinaagi sa voice vote ang pagpagawas og lahi nga subpoena duces tecum nga gitumong sa National Bureau of Investigation (NBI).
Gimanduan sa mga mambabalaod ang NBI nga ipagawas ang tanang rekord sa ilang imbestigasyon may kalabotan sa viral nga video diin nakita ug nadungog si Duterte nga namulong og death threat batok kang Pangulong Ferdinand Marcos Jr., First Lady Liza Araneta-Marcos, ug House Speaker Martin Romualdez.