Nagpagawas og pamahayag ang grupong Mayors for Good Governance kabahin sa kontrobersyal nga dugayng pagkawala ni Senador Ronald “Bato” dela Rosa sa Senado sulod sa pito ka buwan sa wala pa kini mitungha pag-usab niadtong Mayo 14, 2026 aron mobotar sa pag-ilis sa liderato.
Matud sa grupo, samtang nagadawat si dela Rosa og dul-an P300,000 kada bulan, gibanabana nga niabot na sa P2.1 milyon ang iyang nadawat nga sweldo bisan sa iyang pagkawala sa mga sesyon.
Gipasiugda sa mga mayor nga sa ordinaryong mga trabahante, ginapatuman ang prinsipyo nga “no work, no pay,” ug ang ingon nga klase sa pag-absent kasagarang mosangpot sa suspension o pagtangtang sa trabaho.
Alang sa grupo, dakong insulto sa katawhan ang padayong pagdawat og sweldo sa usa ka piniling opisyal nga wala nagtuman sa iyang katungdanan, ilabi na nga daghang Pilipino ang nagaatubang sa kalisod, taas nga presyo sa palaliton, ug krisis sa panginabuhi.
Nanawagan usab sila sa mga senador nga dili himuong dangpanan sa absenteeism ang Senado ug dili panalipdan ang mga opisyal nga naglikay sa responsibilidad.
Sumala sa grupo nga ang mga magbabalaod mismo ang kinahanglan manguna sa pagtuman sa balaod ug pagbarug alang sa accountability, integridad, ug kaayohan sa katawhang Pilipino.