Gibatikos sa Mayor ning dakbayan sa Malaybalay ang kakulang sa disiplina sa katawhan sa pagdumala sa ilang mga basura, butang nga nahimong dakong hagit ug hinungdan sa paspas nga pagkapuno sa landfill sa maong syudad.
Bisan pa man og miubos ang produksyon sa basura sa matag panimalay ngadto sa 0.25 kilograms, ang kadaghan sa populasyon nagresulta gihapon sa pagkolekta sa napulo ka tonelada nga basura matag adlaw, hinungdan nga dako ang pundo sa kagamhanan ang nakalas sumala sa City ENRO.
Tungod niini, nagpahimangno si Malaybalay City Mayor Jay Warren Pabillaran sa mga lumulupyo ning dakbayan nga mahimong mas responsable ug mabinantayon sa palibot pinaagi sa hugot nga pagpatuman sa Clean and Green program matag semana sa mga barangay aron masiguro ang kalimpyo ug malungtarong waste management sa siyudad.
Dugang pa sa mayor, nahimo matud pang mas kumplikado ang sistema sa basura gumikan sa mga nagkaylap nga mga binuhing iro sa palibot nga nakadugang sa problema sa basura.
Lakip sa gipunting sa mayor mao ang kakulang sa disiplina ug responsibilidad sa pipila ka mga tag-iya og iro sa Malaybalay City human maobserbahan ang pagpataka og pagawas sa mga binuhi nga maoy hinungdan sa pagkatag sa mga basura ug pagkahitabo sa mga disgrasya sa motor sa kadalanan.
Nanawagan ang Mayor sa publiko pinaagi sa sibyaanan sa Bombo Radyo nga mamahimong responsable sa ilang mga binuhing hayop aron malikayan ang dugang komplikasyon ug mamentinar ang kalimpyo sa siyudad.
Gihangyo usab niini ang kooperasyon sa katawhan sa pagtuman sa mga balaodnon alang sa kaayohan ug seguridad sa tanang molupyo.