Gibasura sa Malacañang ang suhestiyon ni Senador Alan Peter Cayetano nga magpatuman og interim arrangement sa operasyon sa Senado ug Impeachment Court.
Matud sa suhestiyon ni Cayetano, ang interim arrangement unta maglakip sa “dual-signatory” o “joint-certification” system diin duha ka pirma ang kinahanglan sa tanang disbursement, checks, vouchers, kontrata, ug uban pang dokumento nga may kalabotan sa operasyon sa Senado ug Impeachment Court.
Sumala ni Palace Press Officer, USec. Claire Castro, walay giingong maayong epekto ang maong suhestiyon ug posibleng makahatag pa kini og kalibog sa kasamtangang proseso sa lehislatura.
Dugang pa niini, gipatin-aw ni Castro nga posible nga maulian lang ang nangahitabo kaniadto sa House of Representatives, diin wala matuman dayon ang term-sharing agreement tali ni Cayetano ug ni Congressman Lord Allan Velasco.
Sa pagkakaron, gipasiugda sa Palasyo nga mas angay tutukan ang kalig-on sa institusyon imbis nga magpatuman og bag-ong mekanismo nga mahimong makadugang pa sa tensyon sulod sa Kongreso.