Nahimong viral sa social media ang usa ka lalaki sa Arkansas, Estados Unidos human iyang gipakita ang tinuod nga kinaiya sa pagka-bayani pinaagi sa pagtabang sa usa ka tawo nga naka-wheelchair nga motabok sa usa ka busy nga karsada—samtang nagsul-ob og Spider-Man costume.
Sa video nga narekord sa traffic camera ug gipatik sa Jonesboro Police Department, makita ang usa ka lalaki nga naglisod og tabok sa intersection tungod sa padayon nga paglabay sa mga sakyanan. Sa dihang mihunong ang mga sakyanan tungod sa pula nga suga sa trapiko, kalit nga migawas gikan sa usa ka awto ang usa ka lalaki nga nagsul-ob og Spider-Man costume ug mitabang sa pagtabok sa naka-wheelchair hangtod luwas kini nga nakaabot sa pikas bahin sa dalan.
Ang maong lalaki nailhan nga si Christopher Hellenthal, nga nagsul-ob sa Spider-Man costume isip kabahin sa Superhero Day sa iyang trabaho sa Ultimate Air Trampoline Park.
Matud ni Hellenthal, wala kini magduha-duha sa pagtabang tungod kay nakita niyang nanginahanglan og tabang ang lalaki, ug gusto lamang niyang buhaton ang husto aron malikayan ang posibleng aksidente.
Wala usab niya damha nga mahimong viral ang iyang maayong binuhatan. Matud niini, gipukaw pa siya sa iyang inahan aron ipahibalo nga nagkaylap na sa Facebook ang video sa iyang pagtabang.
Nakadawat ang video og daghang positibong reaksyon gikan sa mga netizens, nga nagdayeg sa iyang pagkamatinabangon
Naglaom si Hellenthal nga ang iyang gihimo mahimong inspirasyon sa uban nga motabang sa ilang isigkatawo, bisan walay kamera o walay tawo nga nagtan-aw. Ang tinuod nga pagka-bayani, matud niini, makita sa yano apan kinasingkasing nga pagtabang sa panahon nga labing gikinahanglan.