Nakatala og bag-ong record ang usa ka estudyante gikan sa Nagoya, Japan human kini nakahimo sa giingong pinakagamay nga humanoid robot sa kalibutan.
Gikumpirma sa Guinness World Records nga si Mitsuya Tatsuhiko mao ang bag-ong naghupot sa titulong “Smallest Humanoid Robot”.
Ang nahimong imbensyon niini usa ka humanoid robot nga adunay gitas-on nga 2.27 pulgada, nga halos parehas ra sa kadak-on sa usa ka ATM card.
Si Tatsuhiko usa ka postgraduate student sa Nagoya Institute of Technology, diin nagtuon og robotics.
Sukad pa sa pagkabata ni Tatsuhiko, interesado na kini sa paghimo og mga robot ug sa edad nga 10 anyos, nakahimo na kini og simpleng robot nga makalihok ang mga braso ug tiil.
Sa pagkakaron, ang pagtuon ni Tatsuhiko nagpunting sa paghimo og gagmay nga robot nga makatabang sa panahon sa mga kalamidad sama sa linog.
Tumong niini ang paghimo og robot nga makasulod sa gagmay ug pig-ot nga espasyo, ilabi na sa mga natumpag nga mga building, aron makatabang sa rescue operations.