Nakasakmit og Guinness World Record ang usa ka circus performer gikan sa Finland nga nailhan isip “The Baron” human niya nabira ang pinakabug-at nga sakyanan gamit lang ang iyang mga atngal o nipples.
Atol sa usa ka show sa Germany niadtong Agosto sa miaging tuig, malampuson niyang nabira ang usa ka karwahe nga mitimbang og 990 kilos, nga susama kabug-at sa duha ka grand piano.
Gigamit ni The Baron ang bug-at nga kadena nga nakakabit sa mga puthaw nga nakatusok mismo sa iyang mga atngal aron mabira ang maong sakyanan.
Nalabwan niya ang miaging rekord nga 988.5 kilos nga gihuptan sa usa ka Amerikano.
Gawas niini, kapin usa na ka dekada nga gihuptan ni The Baron ang rekord alang sa pinakabug-at nga butang nga gibira gamit ang nipples, hinungdan nga nailhan siya isip “world’s strongest nipples.”