Patay ang usa ka 52 anyos nga lalaki human nga gipusil sa may Purok 5 Dumayas, Barangay Maligaya, Malaybalay City, Bukidnon, kagahapong adlawa, nga giingong nag-ugat sa daang panagbangi kalabot sa yuta.
Sumala sa inisyal nga imbestigasyon, padulong sa dalan ang biktima sakay sa iyang motorsiklo dihang kalit siyang gipusil og duha ka beses sa usa ka suspek nga nagtambay sa daplin sa dalan.
Sa lugar sa insidente, nakit-an ang iyang motorsiklo ug mga basiyo sa bala sa kalibre .45.
Ang biktima gidala sa Bukidnon Provincial Medical Center apan gideklarar nga patay alas 9:40 sa buntag tungod sa samad pinusilan sa wala nga kilid sa iyang likod.
Padayon ang hot pursuit operation sa kapulisan aron madakpan ang suspek samtang gisusi usab ang mga CCTV sa lugar.
Ang mga ebidensya gidala na sa Malaybalay City Police Station ug ipasa sa Bukidnon Provincial Forensic Unit alang sa dugang imbestigasyon.