Nagpadayon ang banggi sa Senate majority ug minority bloc human mibalos si Senador Panfilo Lacson kang Senate President Alan Peter Cayetano kalabot sa kontrobersyal nga sugyot sa pag-usab sa Senate rules aron tugotan ang teleconferencing ug online voting sa Senado.
Matud ni Lacson, dili problema ang paghisgot o pagdebate sa amendments sa mga patakaran, ug gisaway niini ang giingong pagdali-dali ug pagbaliwala sa parliamentary procedures aron paspas ang pag-refer sa maong mosyon ngadto sa Committee on Rules.
Giklaro usab ni Cayetano nga wala pa pagboto ang mismong pag-amendar sa Senate rules, kundili ang mosyon lamang nga hisgutan kini sa plenaryo.
Bisan pa niini, mipadayon si Lacson sa gipunting niini nga bisan amendable ang Senate rules, kinahanglan gihapon nga sundon ang hustong proseso ug deliberasyon, ug dili kini himuong “fast break style” nga paglihok sa Senado.
Sa pikas bahin, gipatin-aw ni Senate President Alan Peter Cayetano sa iyang Facebook Live niadtong Mayo 30, 2026 nga ang gisugyot nga amendment sa Senate Rules aron tugotan ang online participation ug pagboto sa mga senador dili “blanket authority” ug walay kalabotan sa impeachment rules sa Senate of the Philippines.
Sumala ni Cayetano nga ang tumong sa maong kausaban mao ang mas inklusibong deliberasyon samtang nagpabiling patas ang proseso.
Gikumpirma usab ni Cayetano nga ipadayon sa Hunyo 4 ang hearings sa Blue Ribbon Committee bahin sa flood control scam.