Gisaway sa usa ka labor consultant ang kagamhanan tungod sa kakuwang matud pa og paglantaw ug tinuod nga interes sa kahimtang sa mga ordinaryong mamumuo nga nag-antos karon sa mubu nga suholan taliwala sa padayong pagsaka sa presyo sa mga palaliton.
Kini ang gibutyag ni Nick Borja atol sa pakighinabi sa Bombo Radyo diin iyang gipadayag ang iyang dakong kahigawad human nga wala matuki sa special session sa Kongreso ang giduso nga House Bill Number 88. Ang maong balaodnon nga gipresentar ni TUCP Representative Raymond Mendoza nagtinguha unta sa pagpatuman sa across-the-board nga dos syentos ka pesos nga national wage increase.
Gipasabot ni Borja nga ang maong sugyot gi-refile lamang human kini nakapasar kaniadto sa third and final reading sa miaging Kongreso ug Senado. Gihulagway niini nga daw gipagana lamang ang mga mamumuo sa dihang nagkaduol na ang eleksyon, apan sa dihang natapos na kini ug nag-adjourn ang kamarabaha, nahanaw lang gihapon ang maong kaayohan.
Gawas sa umento, dugay na usab nga gisinggit sa ilang grupo nga bungkagon o wagtangon na ang Regional Tripartite Wages and Productivity Board kon RTWPB. Dugang pa niini, dili makiangayon ang kasamtangang sistema tungod kay dako ang diskriminasyon ug kalainan sa madawat nga suholan sa matag rehiyon. Gumikan niini, nanawagan kini nga ibalik sa Kongreso ang pagpanday sa usa ka National Legislative Wage aron maparehas na ang dagan sa sweldo sa tibuok nasud.