Nagpabiling dakong hagit ang suliran sa tubig ug imprastraktura sa pipila ka tunghaan sa Dakbayan sa Malaybalay taliwala sa ika 3 ka adlaw sa Brigada Eskwela 2026 alang sa nagkaduol nga abri-klase sunod semana.
Sa eksklusibong pakighinabi sa Bombo Radyo Malaybalay ngadto kang Edsel James Quemado ang school principal sa Dalwangan National High School gitataw niini nga nagkinahanglan sila og 900 ka galon nga tubig matag adlaw alang sa ilang 900 ka mga estudyante. Tungod sa kanihit sa suplay napugos na lang sila sa pagkalot og temporaryong tuboran sanglit wala pa moabot sa lawom nga bahin ang dagan sa tubig aron makuha ang target nga 10000 ka galon matag adlaw.
Gawas sa tubig dako sab nga hagit sa Dalwangan Senior High School ang kakulang sa mga classroom diin gipasabot sa principal niini nga si Flavio Alas Jr. nga posibleng sa covered court na lang una ipahigayon ang klase sa ubang mga estudyante tungod sa pagsaka sa gidaghanon sa mga nagparehistro.
Samtang sa Malaybalay City National High School kun MCNHS mao gihapon nga suliran ang kakuwang sa tubig nga direktang nakaapekto sa paggamit sa mga CR. Sumala kanila ni Brigada Eskwela Coordinator Deserree Jane Benson ug Rebecca Terro nagsalig na lang una ang tunghaan sa rain collector ug sa water tank nga giayuda sa DPWH isip temporaryong solusyon samtang padayon ang enrollment sa tabang sa mga ginikanan.