Gibasura sa Korte Suprema ang mosyon ni Senador Ronald “Bato” Dela Rosa nga nangayo og Temporary Restraining Order (TRO) aron mapugngan ang mga awtoridad sa pagpatuman sa warrant of arrest gikan sa International Criminal Court (ICC).
Sa usa ka espesyal nga en banc session sa Korte Suprema karong adlawa, ang mga mahistrado mibotar og 9-5-1 pabor sa pagbasura sa hangyo sa senador.
Sumala sa Korte Suprema, ang desisyon nagtumong lamang sa mga interim relief sama sa TRO ug Status Quo Ante Order, ug wala pa masulbad ang pangunang isyu sa kaso.
Ang kompletong resolusyon, lakip na ang mga dissenting opinions sa mga mahistrado, gikatakdang ipagawas sa Mayo 25, 2026.
Sa iyang petisyon, gihangyo ni Dela Rosa nga ang Department of the Interior and Local Government, Department of Justice, Department of Foreign Affairs, Philippine National Police, National Bureau of Investigation, Bureau of Immigration, Armed Forces of the Philippines, ug Criminal Investigation and Detection Group dili na mopatuman sa bisan unsang warrant gikan sa ICC, Interpol red notice, o bisan unsang langyaw nga instrumento sa hudisyal nga walay katugbang nga warrant sa hudisyal sa Pilipinas.
Ang warrant of arrest sa ICC batok kang Dela Rosa may kalabutan sa mga kaso sa crimes against humanity nga giingong nahimo ubos sa Davao Death Squad ug sa kampanya batok sa droga sa administrasyong Duterte.