Gi-archive sa Sandiganbayan ang kasong graft batok sa kanhing kongresista ug giingong pugante nga si Elizaldy “Zaldy” Co human molabay ang kapin unom ka bulan sukad gipagawas ang warrant of arrest nga wala gihapon siya masikop.
Gipatin-aw sa Integrated Bar of the Philippines nga ang pag-archive sa kaso wala nagpasabot nga gibasura na kini, kondili usa lamang ka pamaagi sa korte samtang wala pa madakpi ang akusado.
Ang kaso may kalabotan sa giingong maanomalyang P218 milyon nga flood control project sa Naujan, Oriental Mindoro.
Giapil usab si Co sa imbestigasyon sa Office of the Ombudsman may kalabotan sa Sunwest Incorporated, usa sa mga kontraktor sa maong proyekto.
Base sa pinakabag-ong impormasyon sa gobyerno, gituohang anaa sa France si Co ug misumite didto og asylum, samtang padayon pang gisusi sa gobyerno ang resolusyon nga gipagawas sa Sandiganbayan.