Landing sa balay-tambalanan sa Bukidnon Provincial Hospital sa San Fernando ang usa ka 19-anyos nga lalaki human kini giingong gidunggab sa iyang kaugalingong bayaw sa Sitio Kauswagan, Barangay Little Baguio, lungsod sa San Fernando, Bukidnon kagahapong adlawa, Hulyo 3 ning kasamtangang tuiog.
Subay sa inisyal nga imbestigasyon sa San Fernando Municipal Police Station, nasayran nga miadto ang biktima sa balay sa suspek aron komprontahon kini kalabot sa wala mabayring utang nga una na nilang gilalisan sa miaging adlaw.
Apan samtang anaa sa dapit, kalit matud pa nga giduolan sa suspek ang biktima gikan sa luyo ug gidunggab kini kausa sa wala nga bahin sa iyang hawak gamit ang usa ka jungle knife.
Human sa maong panghitabo, daling mikagiw ang suspek bitbit ang gigamit nga hinagiban.
Bisan pa man niini, boluntaryo ra usab nga mitahan sa kapulisan ang 32-anyos nga suspek sa San Fernando MPS pasado alas-11:50 sa gabii sa susamang adlaw, diin gidala ug gitugyan usab niini ang kutsilyo nga gigamit.
Sa pagkakaron, nagpadayon pa ang gihimong imbestigasyon sa mga otoridad alang sa pagpasaka sa tukmang kaso batok sa suspetsado.