Nasakmit sa mga otoridad ang gibana-banaang ₱880,000 nga kantidad sa gidudahang smuggled nga sigarilyo sa usa ka checkpoint operation nga gipahigayon sa kaadlawon niadtong milabayng adlaw sa Brgy. Samburon, Linamon, Lanao del Norte.
Atol sa operasyon sa dihang gisusi ang luyo nga bahin sa maong mga sakyanan, didto nadiskubrihan ang kinatibuk-ang 22 ka master cases o 1,100 ka reams sa “Modern” nga sigarilyo nga walay igong legal nga dokumento gikan sa mga drayber.
Giila ang mga suspetsado nga sila si alyas “Johayver” ug “Oma,” nga parehong residente sa Poblacion sa maong lungsod.
Napakyas ang duha ka drayber sa pagpakita og mga papeles para sa ilang kargamento hinungdan nga gidala dayon sila sa Linamon MPS alang sa dokumentasyon ug dugang nga imbestigasyon.
Ang mga nakumpiskang kontrabando ug mga sakyanan kasamtangang anaa sa kustodiya sa 1st PMFC samtang giandam ang pag-turnover niini ngadto sa Bureau of Customs.
Gilauman usab nga mag-atubang ug tukmang kaso ang mga nalambigit tungod sa paglapas sa balaod batok sa pagpalusot ug ilegal nga produkto sa nasud.