Kapin sa 6,300 ka mga pulis ang i-deploy sa palibot sa Senado karong adlawa, Hulyo 6, aron masiguro ang kalinaw ug kahapsay sa pagsugod sa impeachment trial ni Bise Presidente Sara Duterte.
Sumala ni PNP-NCRPO spokesperson Police Major Hazel Asilo, nga kadaghanan sa gilaumang mga tigprotesta magtapok sa atubangan sa Senado.
Nadiskobrehan usab nga adunay usa ka grupo nga nagplano og martsa padulong sa Senado gikan sa duol nga lugar, busa magdugang pa og mga kapulisan ang awtoridad.
Bisan wala pa’y naaprubahang permit alang sa bisan unsang rally, sigon ni Asilo nga bukas ang PNP-NCRPO sa mga grupo nga gustong magprotesta basta mosunod lamang sa hustong proseso.
Magpatuman usab ang kapulisan og maximum tolerance kon adunay mga raliyista nga mosulay sa pagpaduol sa atubangan sa Senado.
Una nilang gamiton ang dayalogo ug negosasyon pinaagi sa mga negotiation teams, samtang nakaandam usab ang mga public order units kon gikinahanglan.
Wala pa matino sa kapulisan ang eksaktong gidaghanon sa mga motambong sa mga kilos-protesta, apan ilang gipasalig nga andam silang motubag sa bisan unsang kahimtang nga may kalabotan sa seguridad.
Nakatakdang magsugod ang impeachment trial alas 2:00 sa hapon karong Lunes.