Malampusong nakumpiska sa Police Regional Office 10 ang dul-an 16 milyones pesos ka kantidad sa mga kontrabando ug nadakpan ang 217 ka mga indibidwal sa gipahugtang operasyon gikan sa Hulyo 25 hangtod Hulyo 1 sa tibuok Northern Mindanao.
Batok sa ilegal nga droga, nakapahigayon og 68 ka operasyon diin nasakmit ang 222.676 ka gramo sa ilegal nga droga nga adunay kinatibuk-ang kantidad og 1,515,196 pesos base sa standard drug price.
Sa kampanya batok sa sugal, 19 ka operasyon ang gihimo diin 30 ka indibidwal ang nadakpan uban ang mga kagamitan nga nagkantidad og 7,796 pesos.
Nasikop usab ang 67 ka mga wanted person, lakip ang 12 ka most wanted ug 55 ka uban pang wanted nga mga indibidwal sa rehiyon. Labot sa ilegal nga armas, 57 ka operasyon ang miresulta sa pagkadakop sa 10 ka tawo ug pagkasakmit sa 57 ka gagmayng armas ug 3 ka light weapons.
Sa bahin sa ilegal nga pagmina, 10 ka operasyon ang gihimo diin 8 ka indibidwal ang nadakpan ug nasakmitan og mga gamit nga nagkantidad og 28,790 pesos.
Nakapahigayon usab og 32 ka malampusong operasyon batok sa smuggled nga sigarilyo diin 26 ka indibidwal ang nadakpan ug nasakmit ang mga kontrabando nga nagkantidad og 14,375,428 pesos.
Sumala pa kang Police Brigadier General Christopher Abrahano, ang Regional Director sa PRO-10, gipadayag niini ang walay hunong nga dedikasyon sa tanang operating units sa pagpatuman sa balaod.
Gipasiugda usab niini nga magpadayon ang ilang kusganong operasyon aron masiguro ang kaluwasan, kalinaw, ug seguridad sa katawhan sa komunidad.