Gilauman nga posibleng nakabuak sa world record ang kanhi college track star nga si Stephen Biebelhausen human niini makompleto ang usa ka milyang dagan sulod sa 4 minutos ug 17 segundos samtang nagtulod sa stroller sa iyang anak.
Si Biebelhausen, kanhi runner sa Miami University sa Ohio, misalmot sa Guardian Mile race sa Hope Memorial Bridge sa Cleveland, diin gidala ang iyang anak nga si Blake samtang nagdagan.
Kung mapamatud-an sa Guinness World Records ang iyang oras, posible niining mabuntog ang kasamtangang rekord nga 4 minutos ug 26.29 segundos nga nahimo ni Silas Frantz niadtong Hunyo 2025.
Matud ni Biebelhausen, wala niini gitinguha sa sinugdanan ang world record, kundili ang pagbuntog lamang sa course record nga 4 minutos ug 44 segundos ug makasulod sa 4:30 nga oras.
Gilauman usab niya nga mahimo pa niyang mapa-improve ang iyang oras pinaagi sa dugang nga training, ug nagtuo kini nga aduna pa siyay ikabuga sa maong performance.