Gibutyag sa kampo ni Vice President Sara Duterte taliwa sa mahimong pag-testigo ni Ramil Madriaga sa impeachment hearing karung Martes, wala sila nabalaka sa mahimong epekto niini sa resulta sa hearing.
Sa usa ka interview, gipadyag ni Atty. Salvador Panelo Jr. nga ang mga nag-unang pamahayag ni Madriaga, nga bakak kini ug gidala na matud pa ang maong impeachment sa hustong forum sama sa senado diin mas mapamatud-ang peke ug walay kamatuoran ang mga pamahayag niini.
Dugang pa ni Panelo, nga ang bugtong gikabalak-an lang matud pa sa kampo sa Bise Presidente mao ang posibilidad nga motuo ang komite niining mga bakak, ilabi na ang mga miyembro sa House Justice Committee pulos mga kaatbang sa politika sa Bise Presidente.
Samtang, sa usa ka mandato gikan sa Manila Regional Trial Court niadtong Miyerkules, gitugotan sa korte nga motambong si Madriaga sa mahimong hearing sa Kamara de Representantes aron hisgutan ang impeachment ni VP Sara.
Nakalatid sa kamanduan nga bisan gitugotan kining motambong sa hearing kinahanglan gihapon nga adunay proper jail escort si Madriaga ug tugotan lang hangtud alas 8 sa buntag hangtud alas 5:00 sa hapon.