Nisaad ang Japan nga magtagana og $10 bilyon (katugbang sa mga ₱600-Bilyon) aron matabangan ang mga nasud sa Asya, ilabi na sa Southeast Asia, sa pag-access sa enerhiya sama sa crude oil, taliwala sa krisis nga resulta sa gubat sa Iran.
Gipahibalo ni Prime Minister Sanae Takaichi ang maong bag-ong cooperation framework human sa usa ka online meeting uban sa ubang lider sa Asya.
Matud ni Takaichi nga ang Japan nagasalig usab sa Southeast Asia alang sa mga petroleum-derived products, ilabi na sa mga gamit sa medisina, ug gipasiugda niini nga lig-on ang relasyon sa Japan ug mga nasud sa Asya pinaagi sa supply chains.
Ang tumong sa maong framework mao ang pagtabang sa mga nasud sa Asia aron makakuha og crude oil ug petroleum products, pagpadayon sa lig-on nga supply chains, ug pagpalapad sa mga stockpile.
Sumala sa Foreign Ministry sa Japan, ang $10-bilyon nga pondo katugbang sa hapit usa ka tuig nga importasyon sa crude oil sa mga nasud nga sakop sa ASEAN.
Gidawat ang maong inisyatiba sa mga lider sa Pilipinas, Malaysia, Singapore, Thailand, Vietnam, Bangladesh, ug South Korea, ug pondohan kini sa mga institusyon sama sa Japan Bank for International Cooperation, Nippon Export and Investment Insurance, Japan International Cooperation Agency, ug Asian Development Bank.
Sa summit, nanawagan si Pangulong Ferdinand Marcos Jr. nga buhion sa ASEAN ang fuel-sharing pact ug gipasiugda nga walay usa ka nasod sa Asya nga makalikay sa epekto sa supply chain shocks kung mag-inusara lang ang lihok.