Nagpagawas og hugot nga pasidaan ang Islamic Revolutionary Guard Corps (IRGC) sa Iran batok sa bisan unsang pagsulay sa pag-atake sa nasud sa wala pa magsugod ang opisyal nga pagpasidungog sa napatay nga Supreme Leader nga si Ayatollah Ali Khamenei.
Gipasidan-an sa IRGC ang ilang mga kaaway, ilabina ang Estados Unidos ug Israel, nga likayan ang bisan unsang sayop nga kalkulasyon o agresyon samtang nagbangutan ang Iran.
Matud sa IRGC, tubagon nila ang bisan unsang pag-atake pinaagi sa mas determinado ug mas mapintas nga aksyon nga wala pa matikdi kaniadto.
Sa pagkakaron, gipahimutang na sa labing taas nga alert level ang tibuok kasundaluhan sa Iran ubos sa bag-ong Supreme Leader nga si Mojtaba Khamenei.
Kahinumdoman nga napatay si Ayatollah Ali Khamenei sa airstrike nga gihimo sa Estados Unidos ug Israel niadtong Pebrero 28, 2026, sa pagsugod sa gubat.
Ang opisyal nga pagpasidungog kang Khamenei ipahigayon gikan karong Hulyo 4 hangtod Hulyo 9, diin gilauman nga motambong ang kapin sa 10 hangtod 20 milyon ka tawo ug mga dayuhang delegasyon.
Tungod niini, mas gipahugot sa Iran ang seguridad ug temporaryong gisirad-an ang pipila ka airspace aron masiguro ang kalinaw ug kahapsay sa tibuok seremonya.