Nagpabuto og sunod-sunod nga mga missile ang Iran paingon sa Israel, sumala sa militar sa Israel, samtang nagpadayon ang tensyon sa Middle East.
Tungod niini, nibagting ang mga air raid siren sa pipila ka bahin sa Israel, lakip na sa Tel Aviv, diin nadunggan ang mga pagpamuto gikan sa mga interception. Aduna usab mga balay sa amihanang bahin sa Israel nga nangadaot tungod sa nangatagak nga mga debris, apan wala’y gikataho nga namatay.
Taliwala niining pagsaka sa tensyon, matod ni US President Donald Trump, duna sila’y nahitabong “productive talks” o mabungahong panagsultigay sa Iran ug na-oktaba kuno ang plano nga pag-atake sa energy grid sa nasod. Apan hugot kining gihimakak sa usa ka taas nga opisyal sa Iran ug gitawag kini nga “fake news” ug usa ka psychological operation.
Sumala sa Iran, wala’y nahitabong negosasyon tali kanila ug sa US, ug gipahimungtan sa Revolutionary Guards nga magpadayon ang ilang mga operasyon batok sa mga target sa Amerika.
Sa laing bahin, nag-usab-usab ang reaksyon sa global markets; nisaka ang presyo sa lana samtang miubos ang kompiyansa sa merkado tungod sa magkalahi nga pamahayag gikan sa Washington ug Tehran.