Nagpasidaan ang Iran sa tanang oil tanker nga moagi sa Strait of Hormuz nga kinahanglan mosunod sa mga rutang giaprubahan sa ilang gobyerno.
Matud sa militar sa Iran, ang mga barkong dili mosunod sa gipahimutang nga ruta posibleng mag-atubang og aksyon gikan sa ilang pwersa militar.
Gipagawas ang maong pasidaan samtang nagpadayon ang negosasyon tali sa Iran ug Estados Unidos aron mahunong ang tensiyon sa duha ka nasud.
Nagpahimangno usab sa Iran nga motubag kini dayon sa bisan unsang aksyong militar sa US sa Strait of Hormuz.
Bisan pa sa nangaging mga pag-atake sa mga commercial ship, misaka na usab ang ihap sa mga barkong nagaagi sa Strait of Hormuz.
Apan, sumala sa mga eksperto, nagpabiling delikado ang sitwasyon tungod sa padayon nga hulga sa seguridad.