Gipadayag sa Bureau of Fisheries and Aquatic Resources (BFAR) Bukidnon nga padayon ang pag-uswag sa sektor sa pangisdaan sa probinsya ilabina sa freshwater aquaculture ug pagpadako og tilapia.
Sumala kang BFAR Information Officer Mark Anthony Navarro, bisan pa man nga landlocked ang Bukidnon ug walay marine fisheries, nagsalig ang probinsya sa mga suba, sapa, ug fishponds alang sa produksyon sa isda.
Matud ni Navarro nga ang tilapia maoy nag-unang species nga ginapadako gumikan dali kini motubo ug makaangay sa nagkalain-laing kondisyon sa tubig.
Dako usab ang tabang sa mga programa sa gobyerno sama sa paghatag og fingerlings ug technical training alang sa mga mag-uuma ug mangingisda.
Base sa datos sa Philippine Statistics Authority, ang Bukidnon mao ang top-producing province sa Region 10 sa inland fisheries production nga mikabat og kapin 2,610 metric tons, nga nagpakita sa dakong kontribusyon sa probinsya sa food security ug suplay sa isda sa rehiyon.