LIBONA, BUKIDNON — Opisyal nang gideklarang ‘case closed’ sa Libona Municipal Police Station ang imbestigasyon sa pagpatay sa biktimang si Fritz Quijada human nagpakamatay ang iyang live-in partner nga maoy pangunang suspek nga si Melvin Lora.
Sumala kay Libona MPS Deputy Chief PCAPT Erwin James Tabequero, napalong na ang kriminolohikal nga tulubagon ni Lora ubos sa balaod, hinungdan nga dili na mapadayon ang pagpasaka og kaso sa korte.
Gibutyag sa kapulisan nga lig-on nga circumstantial evidence ug mismong ang pag-angkon ni Lora sa iyang mga paryente ang nagtudlo kaniya sa krimen. Gitudlo usab nga motibo ang ‘crime of passion’ o grabeng pagselos tungod sa ikatulo nga partido ug ang plano sa biktima nga mobalik sa Saudi Arabia aron magtrabaho.
Pinaagi sa maong mga ebidensya ug sa gibilin nga sulat sa suspek sa iyang motorsiklo, pormal nang gitapos sa mga awtoridad ang imbestigasyon. Kahinumduman nga si Melvin Lora namatay human miambak sa Atugan Bridge sa lungsod sa Impasug-ong niadtong Agosto 9.