Ginaduso sa mga prosekusyon sa International Criminal Court nga masugdan sa Nobyembre 2026 ang pormal nga paglitis batok kang kanhi Pangulo Rodrigo Duterte may kalabotan sa mga kaso nga crimes against humanity may labot sa iyang kampanya kontra droga.
Sa ilang report nga gisumite niadtong Mayo 15, sigon sa prosekusyon nga ilang target mahuman ang tanang preparasyon sa ebidensya ug dokumento sa dili pa matapos ang Setyembre 2026.
Tungod niini, ilang gisugyot nga sa Nobyembre 30 sa maong tuig magsugod ang trial aron mahatagan og igo nga panahon ang hustong pag-andam sa kaso.
Sa laing bahin, ang mga abogado sa mga biktima nagtinguha nga mas sayo pa ang pagsugod sa paglitis, posible bisan sa Setyembre karong tuiga, aron mapadali ang paghatag og hustisya ug mas daghang biktima ang makaapil sa proseso.
Apan ang depensa ni Duterte, pinaagi sa iyang abogado nga si Peter Haynes, nag-insistir nga kinahanglan susihon pag-usab ang iyang kahimtang sa panglawas tungod sa giingong paghinay sa iyang kondisyon nga posibleng makaapekto sa iyang abilidad sa pag-atubang sa korte.
Matud sa rekord, niadtong Abril 23 gi-kumpirma sa ICC nga “fit to stand trial” si Duterte base sa independent medical evaluation, ug gi-transfer na ang kaso gikan sa Pre-Trial Chamber I ngadto sa Trial Chamber III isip preparasyon sa trial proper.
Si Duterte nag-atubang og tulo ka kaso sa murder ug attempted murder isip crimes against humanity nga may kalabotan sa mga insidente sa iyang panahon isip mayor sa Davao City ug isip Presidente sa Pilipinas.