Gi-aprubahan sa International Criminal Court Trial Chamber III ang pagpadayon sa pag-freeze sa kuwarta nga nakumpiska kang kanhi Pangulong Rodrigo Duterte human siya maaresto ug gidala sa kustodiya sa internasyonal nga korte niadtong Marso 2025.
Nasunod kini human mihangyo ang prosekusyon nga ma-access ang personal nga mga butang ni Duterte ug ipadayon ang pag-freeze sa kuwarta nga nakuha kaniya sa panahon sa iyang pagdakop.
Base sa mga dokumentong gipagawas sa ICC niadtong Hunyo 27, 2026, gi-aboran sa korte ang hangyo sa prosekusyon nga ipadayon ang pag-freeze sa maong kuwarta.
Una nang misupak ang kampo ni Duterte sa maong lakang, nga nag-ingon nga dili na kinahanglan nga i-freeze pa ang kuwarta tungod kay anaa na kini sa kustodiya sa ICC Registry ug wala kini’y epekto sa kasamtangang pagdungog sa kaso.
Wala usab gibutyag sa ICC kung pila ang kantidad sa kuwarta nga nakumpiska gikan sa kanhi Presidente.
Samtang, mihangyo usab ang prosekusyon nga mahatagan og access sa ubang personal nga mga butang nga nakumpiska kang Duterte.
Apan gihangyo sa iyang abogado nga si Atty. Peter Haynes nga dili tugotan ang prosekusyon sa pagsusi sa mga yawi ug uban pang personal nga gamit, tungod kay wala kini igo nga basehan sa kasamtangang mga kasong giimbestigahan.
Dugang usab sa depensa nga kon tugotan ang pagsusi sa ubang mga gamit, kinahanglan mapanalipdan ang personal nga impormasyon ni Duterte ug sa iyang pamilya nga walay kalabotan sa imbestigasyon.