VALENCIA CITY — Patay ang usa ka 41-anyos nga empleyado human gipusil og tulo ka higayon sa wala pa mailhing gunman sa Purok 5, Barangay Vintar, Valencia City niadtong Hulyo 22.
Sa pakighinabi sa Bombo Radyo Malaybalay kang PCpt. Sheila Joy P. Jangad, spokesperson sa Bukidnon Police Provincial Office (BukPPO), nasayran nga nagsugod ang insidente sa panaglalis sa biktima ug sa usa ka drayber sa motorsiklo human kini gibadlong sa biktima nga maghatag og dalan.
Pipila ka minuto ang nakalabay, gikompronta sa laing lalaki ang biktima sa usa ka establisemento, diin mibunot kini og armas ug gipusil ang biktima sa tulo ka higayon. Nakadagan pa unta ang biktima paingon sa iyang sakyanan apan natumba kini ug gideklarang Dead on Arrival (DOA) sa Valencia City Health Center.
Sa kasamtangan, nagpadayon ang dragnet operation sa kapulisan aron mailhan ug madakpan ang suspek, samtang nanawagan usab sila sa publiko nga makipagsumpayan sa labing duol nga stasyon kon adunay impormasyon kalabot sa maong krimen.