Andam ang House prosecution panel nga magpresentar og dili moubos sa 25 ka mga testigo sa Senado sa umaabot nga impeachment complaint batok kang Vice President Sara Duterte.
Sumala ni Manila 3rd District Representative Joel Chua, igo ug sobra pa ang ilang mga ebidensya ug mga testigo aron mapamatud-an ang giingong mga iregularidad sa paggamit sa confidential ug intelligence funds sa Department of Education (DepEd) ug Office of the Vice President (OVP).
Matud ni Chua, dili kinahanglan nga mapamatud-an ang tanang alegasyon sa impeachment complaint.
Gipatin-aw niini nga usa lamang ka Article of Impeachment nga mapamatud-an ug makakumbikto sa Senado igo na aron mapahawa sa pwesto ang Bise Presidente.
Tungod niini, gitutokan sa House prosecutors ang pagpili sa labing kusgan nga mga ebidensya ug testigo aron mapalig-on ang ilang kaso sa umaabot nga impeachment trial.Â
Gipadayag usab Chua ang posibilidad nga ang mga kagubot ug kontrobersiya nga nahitabo sa Senado mahimong gigamit isip taktika aron malangan o malihis ang atensyon sa impeachment proceedings batok kang Vice President Sara Duterte.
Dugang pa ni Chua, kadudahan nga nagkadungan ang dagkong insidente sa Senado ug ang mga importante nga kalihokan sa impeachment case sa Kamara.