Posibleng hisgutan sa umaabot nga panag-istorya tali ni Chinese President Xi Jinping ug Russian President Vladimir Putin ang nagpadayong giyera sa Ukraine.
Sumala sa mga taho, nagdepende karon ang Russia sa mga eksport gikan sa China—sama sa mga dual-use items ug pyesa sa drone—aron mapadayon ang ilang operasyon sa militar. Bisag nagpabiling “neutral” ang China ug nanawagan og malinawong solusyon pinaagi sa dayalogo, gisaway gihapon niini ang mga silot nga gipahamtang sa Kasadpan batok sa Russia.
Gawas sa giyera, hisgutan usab sa duha ka lider ang pagpalalim sa ilang trade relations, ilabi na ang dakong supply sa enerhiya sama sa lana ug gas gikan sa Russia taliwala sa krisis sa Strait of Hormuz. Kini ang ika-25 nga opisyal nga pagbisita ni Putin sa China, pipila ka adlaw lang human mibisita usab si US President Donald Trump sa maong nasod.