Air strikes sa Israel sa Southern Lebanon nikalas og 19 ka kinabuhi

Nikalas og 19 ka kinabuhi ang gilunsad nga bag-ong mga air strike sa Israel didto sa Lebanon.

Base sa Health Ministry sa Lebanon, napulo sa mga namatay—lakip ang tulo ka bata ug tulo ka babaye—ang nakabsan sa kinabuhi human naigo sa pag-atake ang usa ka balay sa lungsod sa Deir Qanoun.

Natala ang maong mga bag-ong biktima wala pa gani mabalita ang usa ka semana human gianunsyo sa Amerika nga nagkasabot ang Lebanon ug Israel nga lugwayan pa og 45 ka adlaw ang ilang ceasefire, samtang gikatakda usab nga ipadayon sa duha ka bahin ang panagsultihanay karong Hunyo.