Gilauman sa Department of Agriculture (DA) nga mukunhod ang gasto sa pagpanguma ug mahupay ang pressure sa sektor sa agrikultura human sa pagbukas pag-usab sa Hormuz Strait, usa ka importanteng agianan sa mga barkong nagkarga og lana.
Kini ang gibutyag ni Francisco Tiu Laurel Jr., ang pag-normal sa pagbiyahe sa mga barko makatabang sa pagkunhod sa gasto sa krudo abono ug transportasyon sa mga produktong pang-agrikultura.
Sa miaging mga bulan, misaka ang presyo sa abono ug kargamento tungod sa tensyon sa Middle East nga nakaapekto usab sa presyo sa pagkaon. Naglaum ang DA nga ang maong kalamboan makatabang sa umaabot nga panahon sa pagpanguma ug makahatag og mas lig-on nga patigayon tali sa Pilipinas ug mga nasud sa Middle East.
Lakip sa mga nag-unang eksport sa Pilipinas ngadto sa Middle East ang pinya, saging, canned tuna, sardinas ug mga produkto sa lubi.