Gipahigayon ang random ug surprise drug testing sa 143 ka empleyado sa City Hall sa Cagayan de Oro City, nga gipasiugdahan sa Philippine Drug Enforcement Agency Region X. Sumala sa report, usa ka empleyado ang nakitang nagpositibo sa ilegal nga droga nga shabu atol sa maong operasyon.
Ang drug testing gipahigayon sa mga personahe gikan sa Public Employment Services Office (PESO), City Assessment Department (CAD), Local School Board (LSB), ug Oro Trade and Investments Promotion Center (ORO-TIPC).
Ang kalihokan kabahin sa paningkamot sa administrasyon ni Mayor Klarex Uy aron masiguro nga drug-free ang workplace sulod sa City Hall.
Sa pagkakaron, gilauman nga padayon nga ipahigayon ang random drug testing aron mapadayon ang disiplina ug kaluwasan sa mga empleyado sa dakbayan.