Nasikop sa gihimong search warrant operation ang usa ka giilang high-value individual (HVI) human makuha gikan sa iyang posisyon ang kapin ₱442,000 nga kantidad sa ilegal nga droga sa Purok 2, Barangay Capinonan, Cabanglasan, niadtong Abril 11, 2026, sa alas 6:05 sa gabii.
Base sa report ni Police Colonel Oliver Sotto Navales, Provincial Director sa Bukidnon Police Provincial Office (BPPO), ang suspek giila sa tago nga ngalan nga si Alyas “Tin2x”, 44-anyos. Ang operasyon gipahigayon sa mga sakop sa Cabanglasan Municipal Police Station ubos sa pagpanguna ni PCPT Linomer L. Caseres, kauban ang 1st Bukidnon PMFC ug Provincial Intelligence Unit.
Narekober sa maong operasyon ang 12 ka dagkong sachet ug pito ka gagmayng sachet sa gituohang shabu nga miabot sa 65 gramos ang gibug-aton, nga duna’y standard drug price nga ₱442,000. Lakip usab sa nakuha ang usa ka pakete sa marijuana, timbangan, ug uban pang mga drug paraphernalia.
Sumala ni PCPT Caseres, dugay na nilang gimonitor si Alyas “Tin2x” human nakadawat og impormasyon nga usa kini sa mga nag-unang supplier og droga sa maong lungsod. Gipasabot sa opisyal nga mas gipili nila ang pag-implementar sa search warrant aron masiguro nga makuha ang daghang bulto sa droga ug mapalig-on ang kaso batok sa suspek.
Kini ang giila nga labing unang dako nga kalampusan sa search warrant operation sa lungsod. Gibutyag usab ni Caseres nga duna pa silay laing mga target nga padayong gimonitor karon sa Cabanglasan nga nalambigit gihapon sa susamang ilegal nga kalihukan.
Bisan pa man sa mga espekulasyon nga basin makagawas ra ang suspek, dako ang pagtuo sa kapulisan nga maglisod kini sa pagpiyansa tungod sa kabug-at sa ebidensya ug sa kadaghan sa droga nga nakuha. Sa pagkakaron, ang suspetsado nag-atubang na og kasong paglapas sa Section 11, Article II sa Republic Act 9165.