MALAYBALAY CITY – Duha ka pamilya ang nawad-an og kapuy-an human gilamoy sa kalayo ang duha ka panimalay sa Purok 3B, Barangay Maligaya, Malaybalay City, pasado ala-una kagahapon sa hapon, Mayo 3.
Sa pagresponde sa Bureau of Fire Protection (BFP)-Malaybalay, hingpit nang naugdaw ang mga balay nga gipanag-iyahan nila ni alyas Jason ug alyas Ricky. Nasayran nga paspas nga nikuyanap ang kalayo tungod kay ginama lamang ang maong mga istruktura sa light materials.
Sumala sa inisyal nga impormasyon gikan sa mga residente, nagsumikad matud pa ang kalayo sa abohan nga bahin sa usa sa mga balay hangtod nga nadamay ang kasikbit niini. Hinuon, walay natala nga samaran o nakabsan sa kinabuhi sa maong insidente.
Sa pagkakaron, padayon pa ang gihimong imbestigasyon sa kabomberohan aron masuta ang tinuod nga hinungdan ug ang kinatibuk-ang damyos nga namugna sa maong sunog.