Nangayo og pagsabot ang mga drayber sa multicab sa rutang Malaybalay–Cabanglasan human napugos sa pagsaka sa ₱120 nga pletehan tungod sa grabeng pagsaka sa presyo sa lana nga miabot na sa kapin ₱100 kada litro.
Sumala ni Bobong Jomar Juan, drayber ug miyembro sa Cabanglasan Multicab Driver Association, kaniadto anaa lamang sa ₱350 hangtod ₱400 ang ilang gasto sa gasolina alang sa usa ka round trip, apan karon miabot na kini sa ₱800 hangtod ₱900. Tungod niini, napugos sila sa pagpuno og ₱20 sa pletehan aron dili malugi sa matag biyahe. Isip paagi sa pagdumala sa operasyon, gibahin na usab sa duha ka hugpong ang biyahe sa ilang 36 ka unit aron dili tanan dungan nga mobiyahe matag adlaw.
Gibutyag usab ni Juan nga wala pa siya makadawat sa gisaad nga fuel subsidy gikan sa gobyerno alang sa transport sector, diin daghan sa iyang mga kaubanan ang nagpaabot gihapon sa second batch sa maong ayuda. Bisan pa man sa kalisod, mipadayon gihapon sila sa pagbiyahe niining Semana Santa aron duna’y ikasustento sa ilang pamilya.
Nagpasidaan ang mga drayber nga kon mosaka pa sa ₱150 kada litro ang gasolina, posible silang mohunong sa pagbiyahe o maglunsad og tigil-pasada (strike) tungod sa dili na makaya nga gasto sa operasyon.