Kampante si Atty. Kristina Conti nga dili maapektuhan ang nakatakda nga confirmation of charges hearing batok kang kanhi Pangulong Rodrigo Duterte sa International Criminal Court (ICC), bisan pa sa lakang sa depensa nga ipadisqualify ang tulo ka abogado nga nagrepresentar sa mga biktima sa kampanya kontra droga.
Ang maong petisyon gisang-at sa lead defense counsel nga si Nicholas Kaufman, nga naghangyo nga tangtangon sila Atty. Joel Butuyan, Atty. Gilbert Andres, ug Atty. Nicole Arcaina tungod sa giingong “conflict of interest.”
Ang maong hangyo gihimo pipila lamang ka semana human ma-appoint ang duha ka abogado isip representante sa mga biktima ug si Arcaina isip case manager.
Sumala kang Atty. Conti, samtang wala pa’y pinal nga desisyon ang ICC sa maong petisyon, magpabilin gihapon ang tulo ka Filipino lawyers isip kabahin sa legal team nga nagrepresentar sa mga biktima.
Gipasabot usab niya nga bisan unsa pa ang kalamboan sa isyu, padayon ang pagdungog sa kaso sa Pebrero 23.
Dugang pa niya, andam mopuli sa pagrepresentar sa interes sa mga biktima ang Principal Counsel sa Office of the Public Counsel for Victims (OPCV) nga si Paulina Massidda kung kinahanglanon, aron masiguro nga mapadayon ang proseso sa korte.
Sa pagkakaron, naghulat pa ang tanang partido sa pinal nga desisyon sa ICC kabahin sa gihangyo sa depensa, apan klaro ang posisyon sa kampo sa mga biktima nga dili kini makababag sa nakatakda nga pagdungog sa kaso.