Gipatugbaw sa usa ka Overseas Filipino Worker (OFW) sa Switzerland ang kaimportante sa pagpahimutang og lig-on nga disiplina ug paglimite sa paggamit og gadgets sa mga anak, imbes nga mogamit og pamunal o pagpanakit.
Sa pakighinabi sa Bombo Radyo, gipahayag ni Bombo International News Correspondent Bujard Pinayswiss nga hugot nga gidili sa nasud sa Switzerland ang bisan unsang porma sa pamunal diha sa pagpadako sa mga bata tungod kay giisip kini nga paglapas sa balaod batok sa pagpanakit o violence.
Gipasabot ni Pinayswiss nga mas epektibo alang sa mga ginikanan ang pagpakita og katig-a o firmness pinaagi sa maayong pagpasabot ug pag-establisar og utlanan aron makat-on ang mga bata sa pagdawat sa mga limitasyon samtang nagdako.
Dugang pa niini, gihatagan usab og pagtagad sa OFW ang dakong kalainan sa pagpadako og anak tali sa Pilipinas ug Switzerland bahin sa teknolohiya. Gipahayag niini nga samtang anad ang pipila ka pamilya sa Pilipinas sa paghatag og cellphone bisan sa gagmay pa nga mga bata, sa Switzerland kasagaran nga mag-edad pa og 13 anyos ang usa ka bata sa wala pa makahuptan sa maong gadget. Gidasig usab niini ang mga ginikanan nga limitahan ang paggamit sa tablets ngadto lamang sa mga educational content ug sa katapusan sa semana.