Ang sakit nga depresyon ang nag-unang hinungdan sa matag higayon nga dunay indibidwal nga maghunos sa kinabuhi.
Kini ang gipasabut ni Stella S. Ferrarez, usa ka Registered Psychometrician atol sa pakighinabi niini sa Bombo Radyo human sa nahitabong pag-ambak sa usa ka 28-anyos nga babaye sa Atugan Bridge, Impasugong, Bukidnon, Pebrero 17, 2026.
Gipasabut niini nga ang paghunos sa kinabuhi maoy nagsilbing katapusan o “means of expiration” sa usa ka tawo nga dugay nang nag-antos sa depresyon, usa ka kondisyon nga mas lawom pa kaysa ordinaryong stress tungod kay mulapas na kini sa duha ka semana nga pag-antos.
Saysay pa niini ang ang mga senyales sa maong balatian makita pinaagi sa mga lihok nga sukwahe na sa naandan, sama sa pagkulong sa kwarto, daling pagkasuko, pagkawala sa gana sa pagkaon, ug ang kalibog diin ang biktima dili na makapasabut sa iyang tinuod nga gibati.
Nanawagan ang eksperto sa mga kabanay nga magmabinantayon ug dili pasagdan ang mga indibidwal nga nagpakita niini nga mga sintomas sulod sa katorse ka adlaw.
Gipahimangnoan usab niini ang publiko nga ang mga “normal” og panghunahuna mao ang angay muhimo og lakang sa pagpangayo og tabang sa mga ahensya sama sa CDRRM o BDRRM aron madala ang biktima sa doktor ug mahatagan og dinalian nga solusyon.