Gisupak sa defense team ni Vice President Sara Duterte ang paggamit sa House prosecution panel og AI-generated images aron ipakita kung unsa kadaghan ang ₱125 milyon nga confidential funds ang giingong gi-withdraw sa usa ka Special Disbursing Officer sa Office of the Vice President o OVP.
Matod sa defense spokesperson nga si Atty. Michael Poa, gikuwestiyon nila ang paggamit sa AI tungod posible nga dili tukma ang paghulagway niini sa aktuwal nga porma o gidaghanon sa ₱125 milyon nga cash.
Gipakita usab sa prosecution ang AI-generated image ang upat ka duffle bag nga giingong adunay sulod nga ₱125 milyon.
Apan subay niini, gipasabot ni private prosecutor Amando Ligutan nga migamit sila sa teknolohiya tungod kay wala sila’y aktuwal nga ₱125 milyon nga cash nga ikapakita sa hearing.